發現天花或牆身滲水，第一個問題往往是：漏水檢測費用要幾多錢？答案由「免費」到「過萬」都有，關鍵在於你揀邊條路、以及你檢測的目的 — 純粹想知源頭，定係要一份喺追討賠償時企得住腳的專家報告。本文拆解各種檢測方法的費用範圍、免費途徑，以及檢測費最終可否向責任方追返。
2026 年新資訊：配合 7 月 16 日實施的滲水調查新程序，政府已於滲水事宜專題網頁（waterseepage.gov.hk）提供滲水調查及維修服務的參考價格，同埋有意提供服務的人士及承建商名單 — 格價前值得先睇一睇官方基準。
免費途徑：滲水辦
由食環署及屋宇署組成的聯合辦事處（滲水辦）調查費用全免，新程序下更會用電子濕度儀加紅外線熱成像分析搵源頭。但要留意三個限制：滲水位置濕度低於 35% 唔會安排跟進；雨水經外牆／天台滲入一般唔受理；同埋滲水辦只負責「叫停滲水」，唔會幫你追討賠償。詳細流程睇食環署投訴漏水攻略。
自費檢測：方法同費用範圍
| 檢測方式 | 適用情況 | 費用參考（HK$） |
|---|---|---|
| 師傅目測＋濕度儀初步檢查 | 想快速判斷問題大唔大 | 數百至千餘元 |
| 色水／螢光劑測試 | 懷疑嚟自樓上廁所、浴缸排水 | 約一千至數千元（視乎測試點數目） |
| 紅外線熱成像掃描 | 大範圍搵濕patch、唔想鑿牆 | 約二千至數千元 |
| 公證行全套檢測連專家報告 | 準備追討賠償、打官司舉證 | 數千至萬餘元 |
實際收費視乎單位面積、測試點數目、報告詳盡程度同公司規模而定 — 呢啲只係市場大概範圍，格價時記得問清楚報價包唔包書面報告：冇報告的檢測，喺法律程序上作用有限。
想追償：點解要俾錢搵公證行？
如果你目標係向樓上或責任方追討賠償，一份獨立專業的檢測報告幾乎係必需品：
- 舉證責任在你：民事索償由申索人證明滲水源頭同因果關係，「我覺得係樓上」喺法庭上唔夠。
- 獨立性：公證行以獨立第三方身分出報告，認受性高過維修師傅口頭判斷。
- 滲水辦查唔到都仲有路：滲水辦嘅測試以「減除衞生妨擾」為目標，佢查唔出源頭唔代表專業檢測都查唔出 — 唔少個案係靠自聘檢測先追到責任。
檢測費可以追返嗎？可以嘗試。合理及必要的檢測費用，一般可作為損失一部分向責任方一併申索 — 記得保留報價單、收據同報告正本。發律師信及索償程序詳見漏水律師信及索償全攻略。
常見問題
漏水檢測有冇免費？
有 — 滲水辦調查全免，但有 35% 濕度門檻，亦唔處理追償。屋苑物管有時會提供初步檢查，都可以先問。
公證行檢測報告同師傅檢查有咩分別？
師傅檢查目的係「搵嘢整」，公證行報告目的係「舉證」— 由獨立第三方以認可方法測試並書面記錄，可用於協商、保險索償及法庭程序。
檢測費用邊個俾？
邊個委託邊個先俾。但若最終證明責任在對方，合理檢測費一般可納入索償金額一併追討。
檢測前要準備啲乜？
影低滲水位置相片、記低出現時間同惡化過程、通知管理處留紀錄，並喺檢測時安排樓上（如合作）一齊在場，減少爭拗。